Proclamatie Prins Roel I
- Bie de gratie en de wiesheid van C.V. “De Aester”.
- Regerendj Prins van ‘t Aesterriek.
- Gebaore in Remunj en sins ein decennium ‘ne Echtenieër.
- Groatvors van de Walnootstraot.
- Zoon van Bert en Annie en broor van Madelijn.
- Man van Linda en vader van Sem en Janou.
- 40 jaor jónk en nag stieëds “alles gaeve in ‘t laeve”.
- Vastelaovesvierder in hert en nere.
- In ‘t dageliks laeve advekaot en óngernummer.
- Altied in väör ‘ne polonaise of ‘n denske.
- Wiltj noats nao hoes väördet d’r mit de confetti nao boete weurtj gevaegdj.
Gaeve te kènne en make bekèndj:
- det ich hieël gruuets bön det ich tót 65ste Prins van ‘t Aesterriek bön gekaoze;
- det väör mich es vastelaovesvierder in hert en nere, ‘ne druim is oetgekómme;
- det ich mit väöl passie en energie in de vootspaore zal traeje van mien ieërbiedwaardige väörgengers;
- det ich blie bön mit mien twieë fantastische adjudante: Laurent en Auwt-Prins Paul VI;
- det mien receptie ‘ne groate bóntje stórm van vereniginge en luuj moog waere;
- det de vlagge op de Plats en in tóp van de Landricus Kirk druueg moge blieve deze vastelaovendj;
- det ich oze carnavalsgroep dit jaor gaer väör miene Prinsewage zeen loupe in de groate optoch;
- det de vastelaovendj ós dit jaor weer allemaol biejein moog brènge en ederein welkóm is óm aan te sloete in de polonaise;
- det de vrolike meziek van zate hermeniekes en zèngendje luuj volle gaas moog klinke door ‘t ganse Aesterriek;
- det ich, same mit de Jeugprins en alle Aesters en Aesterlingskes, ‘t laeve gaon viere;
- det op carnavalsdaensdig oos vastelaoveshert weer gevöldj moog zeen mit werm herinneringe en ich uch ‘ne fantastische vastelaovendj toewèns ónger mien motto:
“Alles gaeve in ’t laeve”
