Proclamatie Rob II
Bie de gratie en de wiesheid van C.V. “De Aester”
Regerendj Prins van ‘t Aesterriek.
Gelökkig getroudj mit Chantal, trotse pap van Noud en ideale sjoanzoon van Jan en Marleen Omloo.
Woontj op de Bekkerstraot.
Van jóngs aaf aan opgevoedj mit de vastelaovestraditie.
Eder jaor same mit vrunj en femilie actieve deilnummer van de vastelaovesoptoch.
Haef zien ieëste mezieknoate gelieërdj bie de hermenie van Ech, mer speeltj noe al 30 jaor ’Sjuuf’ bie de fanfaar van Pej.
Is trainer van de jónges JO 10-3 bie EVV.
Óngersteuntj de ‘Wiekraod Ech Zuid’, mit es hoagtepuntj ‘Grillmeister’ bie de jaorlikse buurt-BBQ.
Geitj volgendj jaor es Prins Rob II Abraham zeen.
Wirktj es manager in de Gezóndjheidszörg.
Fietstj en ‘zeivertj’ sóndessmörges get mit zien fietskammeräöj van TWC “De Naate Zeem” door ‘t Limburgse landj.
Gaeve te kenne en make bekèndj:
- det Noud, Chantal en ich óngeluiflijk verieërdj zeen det ich bön gekaoze es 67e Prins van ‘t Aesterriek.
- det ich mit väöl plezeer en waardig mit de traditie van de Echtse vastelaovendj zal doorgaon.
- det ich gruuets bön óm same mit mien adjudante Andre, Maurice en Auwt-Prins Bert I de vastelaovendj bönne en boete ‘t Aesterriek te gaon viere.
- det väöl minse ‘n woos aafgaeve bie de ‘Karmelietessen’ zoadet mit de vastelaovesdaag de zón moog sjiene.
- det mit passie en energie de vastelaovestraditie door jónk en awd, eder op zien eige meneer, weurtj oetgedrage.
- det de voetbaltalente van JO 10-3 de kómmendje daag getraindj waere door Prins Rob II.
- det de fanfaar van Pej vastelaovesmaondig eine trombonist minder haef, mer ich hun aanmoedig langs te kantj.
- det de sportheldje van TWC de kómmendje zónjige röstig kènne fietse, zónger ‘t ‘gezeiver’ van mich.
- det alle wèntjersporters dit jaor hie in Ech blieve en same mit ós de vastelaovendj gaon belaeve.
- det langs de optochte in ‘t Smaalste Stökske Nederlandj dikke rieje van vastelaovesvierders staon.
- det w’r same mit miene Jeugdprins, mien Jeugdprinses, en alle Aester en Aesterlingskes ‘ne ónvergaetelike vastelaovendj gaon belaeve ónger mien motto:
“Vier ‘t laeve!
En laot ós same ‘ne sjoane vastelaovendj belaeve!”
Gegaeve te Ech op 15 november 2025
tiedes de “Nach van de nuje Prins”
Auwt-Prins Bert I
