Proclamatie Jeugdprinses Jade I
Ich, Jeugdprinses Jade de ieëste
Dochter van Björn en Jacqueline en groate zöster van Rubi en Zara.
Twelf jaor awd.
Wonendje op de Zadelmakerstraot, naeve opa en oma.
Ieëstejaors op Wings Agora in Remunj en awd-lieërling van de Angela-sjoal.
Danseres bie Danzaira in Zitterd.
Saksefoonlieërling van Joyce en saksefonist bie de jeugdfanfaar in Pej.
Swiftie, oftewaal groat fan van Taylor Swift.
‘ne Echte dereleefhöbber en baasje van twieë katte en twieë knien.Óngernummer van Jade’s Krallekraom.
‘n Enorme kletskous en slóknaas.
Altied in väör gekkigheid en gezelligheid.
Gaeve te kènne en make bekèndj:
- det ich dolgelökkig bön óm allerieëste Aesterprinses te moge zeen.
- det daomit ‘ne groate druim oetkömtj.
- det ich väörig jaor al ‘n bietje geoefendj höb es Prinses van de Angela-sjoal.
- det Tess mien adjudante is en det ich dao superblie óm bön.
- det gans Ech, femilie en vrunj oetgenuuedigdj zeen väör mien receptie.
- det de Aesterlingskes ‘t PlatsSpektakel op de kop gaon zètte.
- det alle kènjer oet ‘t Aesterriek mitdoon aan de kènjeroptoch.
- det ‘t zunke straoltj en ‘t allein confetti en glitter raegentj.
- det weer same volop gaon danse, sprènge en vastelaovesleedjes mitzènge.
- det Jade’s Krallekraom mit die daag geslaote is.
- det ich d’r same met Prins Rob II, Jeugdprins Max I en alle Aesters en Aesterlingskes ‘ne ónvergaetelike vastelaovendj van gaon make ónger mien motto:
“Es allerieëste Aesterprinses staon ich väör uch klaor,
laote w’r same genete van de sjoonste tied van ’t jaor!”
Gegaeve te Ech op 16 november 2025 tiedes “De Jóng Aesterparade”
