Jeugdprins van C.V. De Aester worden.....
Geplaatst op zondag 12 december 2010 door Jeugd-commissie
Wat komt er allemaal bij kijken om jeugdprins van C.V. De Aester te worden en hoe gaat dit in zijn werk. In dit stukje geven wij uitleg in het dialect.......dan kun je direct oefenen.
Jeugdprins van de “Aester” waere!
Mit dit stökske perbere w’r aojers en kènjer get informatie te gaeve äöver de ‘ins en outs’ es se Jeugdprins van “De Aester” wils waere.
Alle jónges van groep 7 en 8 van de basissjoale oet Ech, kènne zich via ’t opgaveformuleer det medio november weurtj oetgereiktj oppe sjoale, opgaeve es kandidaat Jeugdprins van carnavalsvereniging “De Aester”. Dit formuleer kèntj geer ouch downloade van oos website: www.aester.nl ’t Ingevöldje formuleer mót väör ‘ne bepaoldje datum ingeleverdj waere (stuitj op ’t formuleer vermeldj) en det is meistal bie Martien Aarts. Daonao weurtj d’r door de väörzitter van de jeugdcommissie ’n aafspraok gemaaktj mit de aojers van de jónges die zich höbbe opgegaeve. ’n Paar man van de Jeugdcommissie höbbe daonao ieës ’n gesprek mit de aojers en den weurtj dudelik oetgelag waat weer verwachte van de Jeugdprins en de aojers. Ónger dit gesprek waere d’r door ós get gegaeves opgesjreve en es alle kandidate bezóchtj zeen weurtj alles mit ’t bestuur doorgenómme. Aan de handj van ’n lies (“Waat verwachte weer van ‘ne Prins en Jeugdprins”) zal ’t bestuur same mit de väörzitter van de jeugdcommissie den oeteindelik beslisse waem de nuje Jeugdprins weurtj, want d’r kèntj oeteindelik mer eine Jeugdprins van “De Aester” waere! W’r kènne natuurlik neet alle puntje vertèlle waat op dees lies staon, mer w’r zulle d’r e paar in ‘t kort besjrieve.
Op de ieëste plaats mót de Jeugdprins neet op vekansie zeen mit de carnavalsdaag en hae mót uteraard in ’t Aesterriek wone. Hae mót carnavalsblood bezitte en ‘t ‘cool’ vènje óm äöveral in de kieker te staon. Hae mót vruntjelik en belaefdj zeen. Hae mót äöveral wo d’r kömtj ’n wäördje spraeke tót zien óngerdane. Ouch mót d’r äöveral mit haer gaon wo de vereniging haer geit, want hae is ummer ’t aevebeeldj van de ‘groate’ Prins. Van de aojers verwachte w’r natuurlik es hunne zoon Jeugdprins is det ze drachter staon en ‘m ouch steune in deze ‘zwaore’ tied. Waat de kleier betruftj hove zie allein mer te zörge väör ’n zwarte bóks, ’n wit humpke, witte hejskes, zwarte zökke en zwarte sjoon. De anger kleier zoa-es ’t witte Prinsejeske, de roaje manjtel, de Prinsesteek mit de vaere, de Prinse- en verenigingsmedaalje krig d’r van de vereniging. Op de Prinsemedaalje kömtj zien naam te staon en die moog d’r nao ’t aaftraeje haoje. De anger kleier die d’r van de vereniging haef gehadj mót d’r den weer inlevere.
De Prins, Jeugdprins en nar waere bie alle activiteite van oos vereniging thoes opgehaoldj en nao aafloup weer nao hoes gebrach door Pedro, al jaore oze vaste chauffeur. W’r höbbe eder jaor namelik ‘ne sjoane gesponsordje wage wo-in oos hoagheje verveurdj waere. Aojers, breurke(s) en zösterke(s) zeen ouch van herte welkom op alle activiteite wo weer nao toe gaon. Bie activiteite die plaatsvènje ónger sjoaltied weurtj door de jeugdcommissie, in äöverligk mit de aojers en de sjoal, bekeke of dit mäögelik is. De Jeugdprins krig van de vereniging ’n aantal medaaljes wo-op ziene naam stuitj. Hae kèntj die oetreike aan aojers, breurke(s) en zösterke(s), femilie, vrundjes en anger Prinse. Dit kèntj d’r doon op recepties van collega-vereniginge, op sjoal of in ’t jeugdhoes.
Väör de receptie, die d’r same mit de ‘groate’ Prins haef, kèntj d’r name doorgaeve die den door de vereniging waere oetgenuuedigdj. De ‘groate’ Prins deiltj op de receptie altied ’n persuuenlik aandènke oet, mer de vereniging wiltj neet det de Jeugdprins dit ouch duitj.
Mit de kènjeroptoch op carnavalsdaensdig krig de Jeugdprins dezelfdje wage väör in de optoch es waat de ‘groate’ Prins op carnavalszóndig haef gehadj. Nao ’t oetrope zulle ze deze wage gaon bekieke in ’n loads in Berkelieër, wo dae door vriewilligers en minse van oos vereniging gemaaktj weurtj. ’t Slók det de Jeugdprins oetguuetj op carnavalsdaensdig weurtj door de vereniging bestèldj en betaaldj. De Jeugdprins mót d’r allein väör zörge det d’r op deze väör hem belangriekste daag good oetgeröstj en fit is óm alles good te kènne mitmake.
Es de Jeugdprins get wiltj drènke, weurtj dit door de vereniging betaaldj. Aojers, breurke(s), zösterke(s) en vrundjes die mitgaon zal väör ’n biedrage gevraogdj waere, zoa-es det ouch bie de leje weurtj gedaon. Mit de carnavalsdaag gaon weer es vereniging saoves gezamelik aete. ’t Aete van de Jeugdprins weurtj ouch door de vereniging betaaldj. Femilie die mit wiltj gaon mót zich van terväör opgaeve bie de sikkertaris van de vereniging en die mótte zelf betale.
Es Jeugdprins wil se natuurlik niks misse, mer de tied wiene d’r thoes mót zeen weurtj aafgespraoke mit de aojers, want weer zègke altied det de sjoal d’r neet ónger moog lieje.
Verder zeen d’r nao ‘t carnavalssezoen nog ‘n aantal activiteite wo de Jeugdprins, c.q. aojers, breurke(s) en zösterke(s) väör oetgenuuedigdj waere zoa-es: de Auwt-Prinse Barbecue, de Zèskamp op Gebrook, ‘t Jeugdprinse Bivak en de Awd-Jeugdprinse Barbecue. ‘t Jaor es d’r aaftreutj kömtj d’r bie de Awd-Jeugdprinse, die ‘n eige hech clupke höbbe en den kèntj d’r mitgaon helpe bie activiteite wo zie aan mitdoon zoa-es de zèskamp op Gebrook, ‘t optraeje oppe Jóng Aesterparade, e.d.
Dit zeen in groate liene oos regels/väörwaarde óm in aanmerking te kómme väör Jeugdprins. Mer weer streve d’r waal nao óm ederein dae gesjiktj is en pastj bönne de structuur van “De Aester” dit te kènne laote mitmake. ‘t Is ‘n geweldige ervaring die emes noats zal vergaete. Höbtj geer nog vraoge den kèntj g’r ummer kóntak opnumme mit de sikkertaris van oos vereniging. W’r kènne den in ’n gesprek ’t ein en anger verder persuuenlik toelichte.
De Jeugdcommissie van Carnavalsvereniging “De Aester”.
