C.V. "De Aester" startj mit väörverkoup Aesterparade
Geplaatst op zondag 13 december 2009 door Jannie Simons
Op vriedig 18 december begintj carnavalsvereniging “De Aester” oet Ech mit de väörverkoup van de jaorlikse Aesterparade. Dees manifestatie vuntj plaats op zaoterdig 9 jannewari 2010 in zaal Royal, Pèjjerstraot 47 in Ech, Óm 19.49 oer maaktj prins Rob I dao zien opwachting, óm tót zien aaftraeje, róndj 22.11 oer, de scepter te zwejje. Den vuntj ’t hoagtepuntj plaats. C.V. “De Aester” maaktj op ‘n ludieke meneer bekèndj waem ’t roer äöver ’t Aesterriek äövernumtj.
Koste noch meutje zeen gespaardj óm de luuj eine ónvergaetelikke aovendj te bezörge. In de sjienwerpers staon de Jónges van de Zank, Leonardo, Thorsten von Lippe Biesterveld, Kartoesj, Beppie Kraft, de Beegter Herzbuben en de buuttereedners Fer Naus en Ger Frenken.
Kaertjes zeen in de väörverkoup väör € 12,50 te kriege bie ‘Drogisterij-Tabak-Staatsloterij en Lotto M. Aerts’ Jäörstraot 1 in Ech. Aan de zaal koste ze € 15,00.
Aesterparade väör Seniore
Ein paar daag nao de Aesterparade is d’r ‘ne aovendj väör de seniore. Op goonsdig 13 jannewari 2010 kènne ze hun hert ophaole bie Leonardo, de Beegter Herzbuben, Trio Ôngeplök, de Jónges van de Zank, dansgroep Wegberg, Beppie Kraft en de buuttereedners Ger Frenken en Ger Naus. De aovendj weurtj gehaoje in zaal Royal aan de Pèjjerstraot. De entreepries bedreugtj € 5,00.
Categories: Algemeen
