"Wie de jeugd heeft, heeft de toekomst!'"
't Aesternès
Op zóndig 12 november 2006 vónj ’t Aesternès van de Awd-jeugprinse van C.V. “De Aester ein nuuj ógerkómme”. Dit Aesternès bestuitj vanaaf de 11-dje van d’n 11-dje 2000. Bie gelaegenheid van ‘t 5½-jäörig bestaon van de jeugcommissie woor dit geäöpendj in Café-Zaal “De Sport” in Berkelieër. Daorin waerdje eine hieële houp attribute óngergebrachtj, die te make höbbe mit de Awd-jeugprinse, zoa wie foto’s van de jeugprinse, persuuenlikke bezittinge oet hun eige prinsejaor, ein Aesterei, ’t ieëste witte prinsejeske mit de steek en de vaere en ein beeldje det door Ger Kessels zaliger is gemaaktj. Dit beeldje stèltj ein ómhoagloupendje spiraal väör, woo-in de jeugprins stieëds ómhoag kiktj, nao de toekóms in de groate vereniging.
Bie deze waere de oetbaters van Café-Zaal “De Sport” hertelik bedanktj väör ’t feit det ze 5 jaor lank ’t Aesternès belangeloos ein daak baove de kop höbbe gegaeve. In 2006, ’t jubileumjaor van de jeugprinse, vónj de presentatie van de attribute, foto’s e.d. plaats in de etalaasj van druuegisterie-tabaksartikele-staatslaoterie en lotto Martien Aerts. Ouch hieväör is de jeugcommissie erg dankbaar.
Ómdet oetgekeke woor nao ein gesjikdje locatie väör permanent gebroek, veel al gaw ’t oug op Aethoes De Plats. Vanaaf ’t begin gaon de jeugprinse mit hun aojers altied hie haer nao aafloup van de groate optoch op zóndig en de kènjeroptoch op dènsdig. Mariet en Vivian, de oetbaters, veuldje zich hieël verieërdj óm ’t nuje Aesternès hoesvesting te moge beje. Drek nao de dialecmès van 12 november waerdje ’t gans vernuudje nès fieëstelik heräöpendj, ónger enorme belangstèlling van C.V. “De Aester”, Zate Hermenie “De Laatbleujers” en anger belangstèllendje luuj.
De Awd-jeugprinse zeen hieël gruuets op hun nuuj tehoes. Dank zègke ze hiebie aan ederein dae dit haef gesteundj, te weite Hubo van Montfort, Handelsonderneming Ton Kurvers, Eethuis De Plats, Schadenet Beckers en de Hieëre Prónkzitting Ech.
